Este grupo de peregrinos son de Bydgoszcz , cidade do norte de Polonia. O grupo está formado por un cura e os seus alumnos que fixeron o Camiño do Norte, desde Oviedo ata Santiago. Cóntannos que a súa motivación foi esencialmente espiritual.

Santiago de Compostela

Orgulloso de “sobrevivir” a unha tendinite que dificultou a súa camiñada, este peregrino coreano explícanos os motivos que lle empurraron a facer o Camiño e as vivencias enriquecedoras que lle achegou. O noso peregrino xa está en Santiago e só lle queda unha cousa pendente: probar o polbo á galega.

Un grupo de persoas con discapacidades físicas, psíquicas e sensoriais percorreu uns 30 quilómetros do Camiño de Santiago sobre bicicletas adaptadas. O obxectivo: reclamar maior atención cara ás necesidades que teñen as persoas con mobilidade reducida á hora de acceder a espazos e contornos, e pór de manifesto a importancia da eliminación de barreiras que lles permitan gozar do turismo e o lecer dunha forma normalizada.

A Fundación También encargouse de organizar a ruta, dividida en tres etapas: na primeira cubriron o traxecto de Fontelas a Salceda durante a mañá do sábado día 10 de outubro; o mesmo día pola tarde, percorreron o tramo entre Ceadoiro e Amenal; e o domingo 11, desde Vilamaior deica o Monte do Gozo, para culminar coa entrada pola Porta do Peregrino en Santiago.

Á marcha sumáronse familiares e voluntarios de Orange, compañía que patrocinou esta peregrinación solidaria.

Esta foi a sexta Ruta do Camiño de Santiago para persoas con discapacidade física, psíquica e/ou sensorial que organiza a Fundación También. Pero este ano tivo un carácter especial xa que ao finalizar a derradeira etapa, na Praza do Obradoiro, o grupo, formado por máis de 70 persoas, foi recibido polo conselleiro de Cultura e Turismo da Xunta de Galicia, Roberto Varela Fariña.

A Fundación También leva unha década traballando polo deporte adaptado. Nesta liña, a Ruta Xacobea permite a integración de persoas con discapacidade nunha actividade deportiva e cultural.

Achegar o Camiño a Xapón. Diso trata a exposición do fotógrafo vigués Luís Ocaña na embaixada española en Toquio (Xapón). Corenta instantáneas en branco e negro que retratan algúns dos máis fermosos recunchos da Ruta Xacobea, desde os cantís de Fisterra ata paisaxes do río Tambre ou o Pórtico da Gloria do Mestre Mateo.

Esta exposición é a continuación doutros proxectos do fotógrafo galego relacionados coa Ruta Xacobea e a de Kumano Kodo, entre os que se contan unha exposición conxunta co fotógrafo xaponés Tomohiro Muda, que se exhibiu en Santiago, Wakayama –rexión pola que transita o Camiño de Kumano–, Toquio e Paris.

Con esta exposición estréitanse se cadra aínda máis os lazos entre o Camiño de Santiago e o Camiño de Kumano Kodo xaponés, co que mantén grandes semellanzas.

O Camiño de Santiago e o de Kumano están irmandados desde o ano 1998. Ambas as dúas rutas teñen as súas orixes na Idade Media, comparten unha longa tradición de peregrinacións e ambas as dúas foron declaradas Patrimonio da Humanidade.
E se aquí a meta é Santiago de Compostela, na ruta xaponesa, salpicada de templos budistas e sintoístas, éo a cidade de Tanabe.

Tanabe, Japón

Gösta Tingström é un ministro luterano sueco que decidiu percorrer o Camiño de Santiago para pórse a proba como ser humano e como sacerdote. O Camiño é tamén para Gösta un test sobre as súas habilidades como predicador e unha fonte de inspiración para ofrecer cambios á Igrexa á que pertence.

Para a presentación do Xacobeo 2010 elixiuse unha data simbólica, o 20 do 10, que recolle ademais o número 10, que é tamén o número de valores sobre os que se artellan os contidos da programación:

1. Austeridade e rigor.
2. Unha programación de atracción internacional.
3. Unha programación desestacionalizada.
4. Descentralización e ampla cobertura territorial.
5. Diversidade temática e de estilos.
6. Promoción da cultura galega.
7. Xeneralidade e especialización.
8. Exclusividade e orixinalidade.
9. O talento e a creatividade artística.
10. As sinerxias con referentes culturais.

A programación do Xacobeo 2010 baséase nos 10 Camiños que conducen a Santiago, nove vías físicas e un camiño interior, o que realiza cada peregrino. Estes camiños materialízanse en 10 áreas de programación das que se presentou un avance de contidos:

1. Camiño da espiritualidade: actos litúrxicos, encontros de mozos europeos e comunidades relixiosas e actividades coas que festexar a experiencia espiritual do Camiño. Trasladouse ao papa Bieito XVI a invitación formal de visitar Galicia para celebrar con peregrinos de todo o mundo o Ano Santo. Tamén se fará a exhibición multideportiva “Por un mundo libre de malaria” con recoñecidos deportistas como Íker Casillas e Rafa Nadal.
2. Camiño da reflexión: congresos, conferencias e debates que xeren reflexión e cuxos contidos queden rexistrados como legado cultural para futuras xeracións. Entre estes, realizarase a segunda edición de Camiños de Concordia con líderes e pensadores de prestixio nas cidades da Coruña, Ferrol, Lugo, Pontevedra, Santiago, Ourense e Vigo. Haberá tamén un Plan de patrocinios de congresos, seminarios e encontros, celebrarase o I Encontro Internacional de Literatura de Viaxes e porase en marcha a Semana Auria de Novela Histórica, que convocará un Premio internacional de novela histórica.
3. Camiño da historia: con proxectos expositivos, entre os que se atopan:
   • Santiago e Europa. A Historia de Diego Xelmírez: exposición itinerante internacional sobre o bispo galego que foi clave na construción da Europa románica. Estará no Musée des Monuments Français de París (marzo a maio), Braccio dei Carlemany, Piazza di San Pietro, en Roma (xuño a agosto) e en Santiago de Compostela (setembro a outubro).
   • 12 meses, 12 conferencias. Metropolitan Museum of Art de Nova York: conferencias sobre o Camiño nas que participan persoeiros da arte e a cultura. Inclúe unha maqueta virtual da Catedral de Santiago (Experiential Technologies Center, Ou. de California).
   • Códice Calixtino en galego: presentación da edición en lingua galega con ilustracións de Francisco Leiro.
4. Camiño contemporáneo: inclúe proxectos expositivos da fotógrafa alemá Cándida Höffer, o fotógrafo galego Manuel Valcárcel, a artista de Ciudad Real Cristina García Rodero e o fotógrafo francés Pierre Gonnord.
5. Camiño das artes escénicas: artes escénicas, danza e teatro, que inclúen:
   • Cirque du Soleil: 95 artistas de 20 nacionalidades e 140 profesionais representan por primeira vez en Galicia o espectáculo “Saltimbanco”, unha exhibición de acrobacias, maxia, luz e son dirixido a todos os públicos.
   • Mayumana: a compañía multidisciplinar israelí mostrará en Vigo e A Coruña o seu último espectáculo de percusión, “Momentum”
   • Merce Cunningham Dance Company: primeira actuación en España desta compañía tras a morte do seu creador.
6. Camiño do audiovisual: proxectos de cine, animación e imaxe visual. Haberá unha liña específica de axuda aos festivais galegos. Ademais, presentarase “O Apóstolo” –a primeira película europea de animación stop motion en 3D– nun concerto dirixido por Philip Glass e interpretado pola orquestra Real Filarmonía de Galicia.
7. Camiño do deporte: o Xacobeo 2010 prestará apoio e patrocinio a equipos de elite e de base. Entre os eventos programados destacan:
   • Travesía a nado do Camiño de Santiago. O nadador David Meca tentará cruzar a Ría de Arousa (Pontevedra) por primeira vez.
     • A Carreira da Muller. Este circuíto de carreiras solidarias para mulleres está organizado polas revistas Sport Life e Runner’s World. Parte do importe da inscrición dedícase á loita contra o cancro de mama.
8. Camiño da gastronomía: inclúe un Plan de programación gastronómica con diversas iniciativas para promover a gastronomía galega no mundo a través de soportes editoriais e proxectos artísticos.
9. Camiño infantil: proxectos relacionados coa infancia, entre os que salientan:
   • Programa educativo. Artéllase a través de actividades pedagóxicas que se realizarán nas escolas de Galicia e España. Un concurso contribuirá a divulgar a esencia do Camiño desde a escola a máis de 300.000 fogares.
   • Convenio con TVG (Televisión de Galicia). Éstáse traballando na creación dunha acción itinerante que combina un programa televisivo cun evento presencial onde os cativos son os protagonistas.
   • Camiño recreado. Un peregrino virtual guiará aos máis pequenos. Este proxecto expositivo-audiovisual achegará os nenos á nosa historia recreando en imaxes 3D o Santiago medieval e a Iria Flavia da época romana.
10. Camiño da música: a música no Xacobeo terá seis apartados temáticos: clásica, pop, rock, electrónica, jazz e folk. Destacan:
    • A recoñecida directora vasca Inma Shara dirixirá o concerto inaugural do Xacobeo, para o que compuxo unha melodía que alume a inauguración do Ano Santo.
    • O Festival Xacobeo contará cos solistas Lang Lang (piano), Cecilia Bartoli (mezzo) e Anne-Sophie Mutter (violinista); a orquestra Palau de lles Arts de Valencia, dirixida por Zubin Mehta, e a ópera “Parsifal” en versión de concerto con Vasily Petrenko.
    • O Festival Via Stellae ofrecerá máis de 100 concertos en ciclos específicos. Intervirán, entre outros, os directores William Christie, Christophe Rousset, Simone Kermes ou Jordi Savall, e a Mahler Chamber Orchestra, ou a Orquestra Barroca de Venecia.
    • Festival do Sónar. Celebrarase por primeira vez en Galicia e con artistas galegos e de forma simultánea ao Festival de Música Avanzada e Arte Multimedia de Barcelona (17, 18 e 19 xuño).
    • Festival MTV Galicia. A cadea de televisión internacional presentará en primicia un gran concerto e un programa especial con artistas españois e internacionais que se retransmitirá en todo o mundo.
    • Festival 40 Principais. Elaboración e radiodifusión dunha serie de programas en directo desde Galicia e unha xira por catro cidades con diferentes grupos musicais de éxito.
    • Mark Knopfler. O guitarrista escocés viaxará a Santiago para presentar o seu novo album, “Get Lucky”.
    • Mudhoney. Esta banda, emblema do movemento grunge de Seattle, conmemora seu 20º aniversario.
    • Vetiver. Presentará o seu álbum “Tight Knit” acompañado de Fruit Bats, outra das bandas do prestixioso do selo Sub Pop.
    • Xira Galega cos artistas de folk Berrogüeto, Luar na Lubre, Susana Seivane, Cristina Pato, Bonovo, Fuxan vos Ventos e Leilía.
    • Edición de “Cantigas do Camiño”. CD recopilatorio con prestixiosas bandas de folk galego que contribuirá a súa promoción nacional e internacional.

Nunha conxuntura histórica na que se está a revisar a validez dos modelos políticos e sociais, Xacobeo 2010 propón aprender do pasado, comprender o presente para avanzar cara ao futuro. Galicia está desexosa de acoller con veneración milenaria a cada un dos cidadáns do mundo que busquen alumear o seu propio camiño interior.

Esperámosvos a todos no 2010.

Saímos do Alto do Poio con dous peregrinos de Alacante. Esta é a súa segunda experiencia no Camiño, unha ruta na que volven palpar a fraternidade e o amor que se profesan os peregrinos, e experimentar o sempre enriquecedor intercambio cultural.

O cantante e deportista invidente Serafín Zubiri foi o primeiro en probar sobre o terreo os dispositivos tecnolóxicos do proxecto “O Camiño dos Satélites”. Trátase dun plan impulsado pola Asociación Galega de Empresas TIC (AGESTIC) e a Fundación Tecnoloxía Social (FTS) –co apoio do Xacobeo 2010– para facer accesible o Camiño a persoas con distintas discapacidades e dar cobertura a outras en risco de exclusión tecnolóxica.

Nunha proba piloto, Zubiri, que xa fixo o Camiño de Santiago sete veces, realizou a primeira etapa da Ruta Francesa acompañado por Enrique Varela e José Mari Arrazola, presidente e vicepresidente de FTS, respectivamente. Os tres camiñaron 21,5 quilómetros e puideron comprobar como a tecnoloxía pode axudar ás persoas invidentes a superar algunhas dificultades da ruta. Tal e como anunciou FTS en Twitter, “os dispositivos probados en ‘Camiño dos Satélites’ responderon ás expectativas”.

Estas ferramentas van desde un bastón de peregrino con antena para recibir sinais de marcas RFID soterradas no chan que informarán de situación, distancias e outros datos, ata un GPS conversacional, idóneo para viandantes e moi usado por persoas cegas, pasando por compases electrónicos, guías en e-book, zapatillas de deportes conectadas a un iPhone e outros mecanismos de utilidade.

Ademais, o proxecto terá proxección na rede, ao apostar polos blogues e redes sociais como Facebook e Twitter.

Ademais, contarase co apoio do sistema de información e xeolocalización Kapten, un pequeno GPS sen pantalla e de só 50 gramos de peso que funciona por recoñecemento de voz e text-to-speech.

A idea é levar no Ano Xacobeo a 20 peregrinos tecnificados (persoas cegas, xordas, con outras afeccións ou simplemente afeccionados á tecnoloxía) de Roncesvalles a Compostela, utilizando estes dispositivos de apoio.

A peregrinación realizarase entre o 2 de outubro e o 1 de novembro de 2010. Pero a idea é que este proxecto teña continuidade, polo que a experiencia se repetirá todos os anos.

As 20 prazas gañaranse por casting. En xaneiro de 2010 abriranse a páxina web e as redes sociais do “Camiño dos Satélites”, e serán os internautas os que fagan unha primeira selección entre os candidatos. E xa cara a setembro farase o derradeiro casting en directo cos finalistas.

En conclusión, do que se trata é de facer accesible o Camiño de Santiago a todo o mundo. E, sen dúbida, o lema xa é todo un acerto: “A tecnoloxía fainos iguais”.

Queremos saber cales son as túas motivacións para facer o Camiño. Queremos coñecer as causas que impulsan a un a coller unha mochila nas súas vacacións e percorrer longas etapas que finalizan en modestos albergues, ás veces calados ata os ósos pola chuvia, outras deshidratados pola calor, cos pés cheos de bochas e, por veces, con algunha lesión física.

Segundo datos recollidos pola Oficina do Peregrino, a motivación relixiosa segue sendo a máis importante. Basta con botar unha ollada ás estatísticas de 2008. Dos 125.141 peregrinos que pasaron o ano pasado por esta oficina, 50.732 manifestaron percorrer o Camiño exclusivamente por motivos relixiosos; 63.598 fixérono por motivacións relixiosas e outras; e 10.811 peregrinaron a Santiago de Compostela por causas non relixiosas.

Pero dentro destas tres categorías agóchanse seguramente tantas motivacións como peregrinos. Motivacións persoais que poden ir desde unha promesa ou un sentimento relixioso, ata un reto persoal ou unha causa solidaria.

Propómosvos que compartades aquí, cos vosos comentarios, os motivos que vos apuxan ao Camiño de Santiago. Se cadra sexan algúns destes:

• Busca interior, espiritualidade
• Crenzas relixiosas
• Unha promesa
• Cultura e arte no Camiño
• Natureza no Camiño
• Aventura
• Deporte
• Vacacións e turismo
• Reto persoal
• Causa solidaria
• Meditación
• Para reorientar a miña vida
• Para procurar respostas

¿E ti por que fas o Camiño?

Unha nova Ruta Xacobea, un novo Camiño celestial, unirá a dous dos grandes destinos da peregrinación católica: Roma e Santiago de Compostela. Obra Romana de Peregrinacións (ORP) –a axencia de viaxes do Vaticano–, e a rede Camiños de Europa promoven a liña de voos directos entre ambas as dúas cidades, operados pola compañía Mistral Air.

Aínda que o administrador delegado de ORP, o pai Cesare Atuire, xa viaxou a Santiago nun primeiro voo operado pola compañía, o programa comercial de viaxes iniciarase no Ano Santo co obxectivo de levar a un bo número de peregrinos ata Compostela e de promover o Ano Xacobeo.

A data escollida para comezar estes voos será, como non podía ser doutra forma, na Semana Santa, e nun principio manteranse ata outono do vindeiro ano. Con este plan, os aeroportos de Fiumicino e Lavacolla serán un fervedoiro de peregrinos.

ORP e Mistral Air xa realizan voos a Xerusalén, Lourdes, Fátima e Turquía por motivos relixiosos. Agora, co gallo do Xacobeo 2010, conectarán a dous dos principais focos da cristiandade, sumándose así Santiago ás rutas relixiosas en chárter.

Por certo, o pai Cesare Atuire, responsable deste proxecto de altos voos, ten contas abertas nas redes sociais LinkedIn e Facebook. Seica pode interesarche acceder a el por estas canles e saber un pouco máis das novas liñas celestiais e outros asuntos sobre as peregrinacións. O tes ao alcance dun click.